Бу күннэргэ Бороҕоҥҥо буола турар Саха сирин норуоттарын VIII спортивнай оонньууларын чэрчитинэн сынньалаҥҥа сыһыаннаах культуурнай хайысхалаах тэрээһиннэр былааннаммытын курдук ыытыллаллар. Күн ахсын дьон-сэргэ спорт күрэхтэһиилэрин таһынан, киэһээ өттүгэр саха эстардатын уонна улуус нэһилиэктэрин ырыаһыттара кыттыылаах кэнсиэрдэргэ көтүппэккэ сылдьаллар.
Уус-Алданнар биир дойдулаахтара, музыка алыбын баһылыы туппут, элбэх ырыа ааптара, «DUORAAN RECORDS» студия салайааччыта Бүөккэ Бөтүрүөп Саха сирин норуоттарын VIII спортивнай оонньууларын чиэстээн уонна биир дойдулаахтарыгар анаан "УУС-АЛДАНЫМ" диэн саҥа ырыаны сүрэхтээтэ. Ырыа историятын кылгастык билиһиннэрдэххэ, сүрүн толкуйун "САХАКОНЦЕРТ" агентство салайааччыта Василий Кривошапкин уонна Сунтаар улууһуттан төрүттээх поэт, ырыа айааччы доҕоро Мэхээс Сэмэнэп–Мэхээс Сээркээн тыл-өс өттүнэн сааһылаан ырыаны айан оҥорбуттар. Манна Бүөккэ күннэтэ алтыһар чугас доҕотторо ыллаан-туойан клип устубуттар. Онон бу күннэргэ Бороҕоҥҥо буола турар Саха сирин норуоттарын VIII спортивнай оонньууларыгар бэртээхэй бэлэх буолла.
Итини таһынан дьонугар-сэргэтигэр уонна күрэхтэһиигэ кытта кэлбит спортсменнарга уонна көрөөччүлэргэ анаан «DUORAAN RECORDS» студия уонна «САХАКОНЦЕРТ» агентство холбоһуктаах проектарынан «ОЛОҤХО» сынньалаҥ киинигэр күн ахсын биллэр-көстөр эстрада ырыаһыттара кыттыылаах «МҮРҮ МЬЮЗИК ФЕСТ»! диэн аныгылыы тэтимнээх саха поп-музыкатын фестивалин уонна уоттаах-күөстээх үҥкүү киэһээтин тэрийэллэр. Манна да5атан эттэххэ алта күн устата буолар фестивальга хаачыстыбалаах тыас-уус, уот-күөс техниката биир улахан массыынанан тиэллэн кэлэн, үлэ бөҕө ыытыллыбыт. Онон дьон-сэргэ тоҕуоруһа мустан, биир эмиэ бэртээхэй киэьээни атаарыахтара диэн эрэнэбит.
Саха сирин норуоттарын VIII спортивнай оонньууларын культурнай тэрээһинин пресс киинэ